Шығыс Қазақстан облысында Ауыл шаруашылығын қаржылай қолдау қоры арқылы етті мал шаруашылығын дамытуға 2,3 млрд теңге бағытталды

29.12.2018

Шығыс Қазақстан облысында 56 шаруашылық жеілдетілген несие қаржысына шет елден тұқымды мал сатып алуға мүмкіндік алды. Жаңартылған «Сыбаға» бағдарламасымен тұқымды мал сатып алған шаруашылықтардың бірі – «Елена» ШҚ. «Ауыл шаруашылығын қаржылай қолдау қорынан» несие алған шаруа қожалығы Алтай өңірінен қазақтың 47 ақ бас сиырын Жарма ауданы Бестерек ауылына әкелді.

«Ауыл шаруашылығын қаржыла қолдау қоры» фермерлік шаруашылықтарды қолдауға бағытталған «Сыбаға» бағдарламасын жүзеге асыруда. Несиелер ет бағытындағы тұқымды мал басын сатып алуға беріледі. Бұл келешекте табынның өнімділігі мен отандық етті шетелге экспорттау көлемін арттыруға әкеледі.

Елена Закимова, «Елена» ШҚ басшысы:

Біз мал шаруашылығымен 2014 жылдан бастап айналысамыз. Өзіміздің қыстауларымыз, қажетті фермалар, жеріміз бар. Жазда «Ауыл шаруашылығын қаржылай қолдау қорынан» несие алып, 47 ақбас сиырын Ресейден әкелдік. «Сыбаға» бағдарламасының шарттары біз үшін өте тиімді – пайызы төмен, мерзімі ұзақ, сомасы көлемді. Үстемесі жылына 14 пайыз болғанымен, мемлекеттік субсидия арқылы 4 пайызға дейін төмендетіледі. Оған қоса, шет елден әкелінген әр тұқымды мал басына 225 мың теңге төленеді. Және бұқашықтарды мал бордақылау алаңына тапсырған кезде әр килограммына 200 теңге беріледі. Бұл шағын фермерлік шаруашылықтарға деген үлкен көмек. Бұқаларды «SemBell» бордақылау алаңына тапсырамыз, ол жөнінде келісім-шартымыз да бар.

Қазақы ақбас сиыры 20 ғасырдың ортасында шығарылған және күрт континенталды климатқа бейімделген. Жаңадан туылған бұзаудың салмағы 27-30 кг болады, ал 8 айға қарай салмағы 240 кг дейін өседі.

Данияр Үсіпбеков, «Ауыл шаруашылығын қаржылай қолдау қоры» АҚ Шығыс Қазақстан филиалының директоры:

- Мал басының өсуін қамтамасыз етуге және ірі қара еті экспортының көлемін арттыруға бағытталған «Сыбаға» бағдарламасы арқылы Шығыс Қазақстан облысында 2,3 млрд теңгеге 56 жоба мақұлданды. Оның ішінде 45 шаруашылық 1,7 млрд теңге көлемінде несиелерді алып, жұмыстарын жүргізуде. Жалпы, бұл бағытта жергілікті шаруашылықтар шет елден 3 мыңнан астам тұқымды ірі қара мал басын әкеледі және 3 мыңнан астам ұсақ мүйізді мал басын сатып алады деп күтілуде.

Жалпы, республика бойынша «Ауыл шаруашылығын қаржылай қолдау қоры» «Сыбаға» бағдарламасымен 15,4 млрд теңгеге 756 шаруашылықтың өтінімдері мақұлдады. Несиелік қаражатқа 26 мың ірі қара және 74 мыңға жуық ұсақ мүйізді мал басы сатып алынуда.