Өскеменде Жастар жылы аясындағы іс-шаралар басталды

30.01.2019

Облыс орталығында 2 мыңға жуық жастардың қатысуымен "Тәуелсіздік ұрпақтары" атты салтанатты іс-шара өтті. Өскемен жастарын Олимпиада чемпионы Ольга Рыпакова, кәсіпқой боксшы Қанат Ислам, ақын Қалқаман Сарин және т.б. танымал тұлғалар құттықтады.

Іс-шараны Өскемен қаласының әкімі Жақсылық Омар ашты, ол "Дәл осы табысты, белсенді жастар - еліміздің гүлденуі мен тұрақты дамуының кепілі" деп атап өтті.

Концерт барысында Қанат Ислам жас спортшы Бауыржан Сәтжановқа бокс қолғабын, Ольга Рыпакова жеңіп алған кубоктардың бірін жас жеңіл атлетші Лиза Матвееваға, ақын Қалқаман Сарин жас ақын Ерасыл Ермекұлына "жазушының қаруы" - қалам сыйлады.

Қонақтардың құттықтау сөздерінен кейін концерт атақты әртістердің өнер көрсетуімен жалғасты. Өскемендік жастар алдында "Made in KZ" кавер-тобы, "Х Фактор" телевизиялық жобасының жеңімпазы Евгений Выблов, "Ты супер" телевизиялық жобасының финалисті Влад Лоскутов, "Инкорро" тобы өнер көрсетті.

Айта кету керек, Өскемен қаласында Жастар жылы аясында жастарды қолдау және жастар мәселелерін жүйелі шешуге бағытталған 100-ден астам түрлі іс-шаралар өткізу жоспарланған.